مراجعة فيلم لاتزال أليس still Alice

فيلم #still_alice

بالعربي: تمشي بمعنيين: (لاتزال أليس) أو (أليس في مكانها)

الفيلم بيحكي عن أليس، أليس بروفيسورة لُغويات linguistics ناجحة ف شغلها وسعيدة مع أسرتها .. لكن أليس ف وقت بدإت تلاحظ انها بتنسى حاجات مكانتش بتنساها قبل كدة .. بعد الكشف أليس بتكتشف ان عندها مرض ألزهايمر .. أليس بتخوض رحلة ال ألزهايمر اللي مليانة معاناة وألم وخوف

.

طبعا لازم نقول ف الاول ان المرض اسمه alzheimer's disease ، ف الألف واللام اللي ف البداية من ضمن الاسم مش أداة تعريف، ف مفيش حاجة اسمها "زهايمر" ، لكن النكرة "ألزهايمر" والمُعرّفة "الألزهايمر"

كل الناس عارفة ان مرض الالزهايمر معناه ان الواحد ينسى، ودة تبسيط مخل نسبيا، بالاضافة ان مش معنى ان حد ذاكرته متأثرة ان عنده ألزهايمر

الالزهايمر هو مرض بيسبب ضمور وانكماش في خلايا المخ

أول اعراضه الظاهرة فعلا هو نسيان الاحداث القريبة، لكن المرض بيكون بدأ انتشاره قبل ملاحظة موضوع النسيان بفترة طويلة

الضمور بينتشر ف كل خلايا المخ مع الوقت، فمع النسيان، المرض بيأثر ع شوية وظايف تانية متعلقة بالتفكير والتصرف، زي

الحساب والارقام - اتخاذ القرارات البسيطة - التخطيط - تأثيرات ع شخصية المريض وتعاملاته

للاسف حتى الان المرض مالوش علاج نهائي، لكن المتاح هو علاجات بتبطئ تقدم المرض وتخفف الاعراض وتساعد المريض على التكيف ومواصلة الحياة

اخيرا.. هل معنى اني بنسى ان عندي الألزهايمر دة؟

لا .. في مليون حاجة ممكن تخليك تنسى، ومعظمهم حاجات بسيطة او مؤقتة

والغالبية العظمى من مرضى الألزهايمر بيبقى سنهم ٧٥ وانت طالع، ونادرا لما ييجي للسن الاصغر

.

مريض الالزهايمر بيبقى عايش ف جحيم، لان ذاكرتنا هي الثروة الحقيقية بتاعة كل واحد فينا، الذاكرة هي اللي بتشكل شخصيانا وإدراكنا وفهمنا للعالم ووجودنا، لو كل دة راح هيفضل ٱيه؟!